Shëndeti I Lëkurës: Gabimet Më Të Shpeshta Që Duhet Shmanguar Gjatë Verës

Edhe pse tashmë e dimë se sa i dëmshëm mund të jetë dielli për shëndetin e lëkurës, provat tregojnë se ne vazhdojmë të bëjmë të njëjtat gabime çdo verë. Le të hedhim një vështrim në gabimet më të zakonshme ndaj lëkurës që i bëjmë gjatë verës.
1. RRURJA OSE DEPILIMI PARA PLAZHIT Heqja e qimeve nga trupi pak para plazhit është diçka që pothuajse të gjithë e kanë bërë. Mund të duket e padëmshme por nuk është. Si depilimi ashtu edhe rruarja nënkuptojnë acarim mekanik në një shkallë të caktuar. Ky acarim është shumë i lehtë, por e bën lëkurën më të ndjeshme ndaj reagimit të tepërt ndaj rrezeve UV, duke rritur rrezikun e djegies nga dielli ose formimin e njollave të errëta dhe rrudhave. Prandaj, ju rekomandojmë t’i hiqni qimet të paktën 1-2 ditë para se të ekspozoheni në diell.

2. PËRDORIMI I PËRBËRËSVE PËR KUJDESIN E LËKURËS QË E BËNË LËKURËN TUAJ FOTOSENSITIVE
Disa përbërës të produkteve të kujdesit të lëkurës mund të rrisin ndjeshmërinë e lëkurës ndaj dritës së diellit. Fotosensitiviteti e bën lëkurën tuaj më të ndijshme ndaj efekteve të dëmshme të ekspozimit në diell (përfshin njollat, fotoplakjen, djegien nga dielli, etj.). Prandaj, duhet t’i identifikoni këta përbërës dhe t’i përdorni vetëm gjatë natës ose kur dielli është i butë.
ALFA HYDROXY Acidet (AHAs): acidet glikolik, laktik, citrik, malik dhe mandelik
ACIDI SALICILIK
RETINOL
PEROKSIDI BENZOIL (zakonisht përdoret për të përmirësuar aknet)
Të gjithë këta përbërës përmirësojnë gjendjen e lëkurës dhe largojnë qelizat e vdekura nga sipërfaqja, duke e bërë shtresën e kornesë më të hollë. Në përqendrimin e duhur, këto acide përmirësojnë dukshëm pamjen e lëkurës. Ato mund të jenë të mira për shëndetin e lëkurës, por jo nëse i aplikoni para se të dilni në plazh.
Kini parasysh se edhe disa barna mund ta bëjnë lëkurën tuaj fotosensitive.

3. EKSFOLIMI I TEPRUAR
Peeling kimik është shumë i mirë për trajtimin e disa sëmundjeve të lëkurës dhe për përtëritjen e lëkurës. Ato shkaktojnë një eksfolim të kontrolluar të shtresave sipërfaqësore të lëkurës për të nxitur regjenerimin qelizor dhe për të favorizuar depërtimin e përbërësve aktiv në shtresat më të thella të lëkurës. Pavarësisht përfitimeve të shumta, pilingjet kimike shkaktojnë hollim të barrierës së lëkurës dhe për rrjedhojë, një ulje të aftësive mbrojtëse të lëkurës. Pas një peeling, lëkurës i duhen të paktën disa ditë për të rikuperuar të gjitha funksionet e saj mbrojtëse dhe pak më shumë për të qenë në gjendjen më të mirë. Kjo është arsyeja pse pas një peeling kimik ju thuhet të mbani krem ​​kundër diellit SPF50 çdo ditë për të paktën disa javë. Nëse dëshironi të bëni një piling kimik gjatë verës, vazhdoni, por kërkoni nga specialisti/ja juaj e lëkurës për një të butë. Rekomandojmë të mos e bëni shumë shpesh gjatë muajve më të nxehtë.

4. PËRDORIMI I KREMIT QË NUK MBRON MË
Sezoni veror sapo ka nisur dhe ju po përgatitni çantën tuaj për ditën e shumëpritur kur do të vishni rrobat e reja të banjës dhe do të bëni zhytjen e parë në det. Më pas, kuptoni se keni ende një shishe krem ​​dielli nga vera e kaluar, por duket sikur nuk ishte mbyllur aq mirë dhe ka krem ​​përreth kapakut. A duhet ta përdor apo jo? Është një pyetje e ndërlikuar. Shumica e kremave kundër diellit janë të dizajnuara të zgjasin 3 vjet pa u hapur; mund të kontrolloni datën e skadencës në kuti. Për të ditur se për sa kohë do të jenë efektive pas hapjes, duhet të kontrolloni datën PAO (Periudha pas hapjes). Zakonisht tregohet në muaj me një numër dhe shkronjën M. Për shembull, 12M do të thotë që mund ta përdorni për 12 muaj pas përdorimit të parë. Megjithatë, për të ruajtur gjendjen e kremit tuaj ndaj diellit, duhet të merrni disa masa paraprake:
• Mbylleni shishen siç duhet,
• Mos e lini kremin tuaj të diellit nën diell,
• Shmangni nxehtësinë ose të ftohtin ekstrem,
• Mbajeni në një vend të thatë dhe të errët
• Nëse nuk ju kujtohet kur e hapët shishen ose dyshoni se mund të jetë dëmtuar, mund ta dalloni duke kontrolluar strukturën, erën dhe ngjyrën. Një krem ​​kundër diellit në gjendje të keqe fillon ti ndahet faza e ujit nga ajo vajore. Ju gjithashtu mund të vëreni ndryshime në erë ose ngjyrë.

5. MOS APLIKIMI I MJAFTUESHËM I KREMIT KUNDËR DIELLIT
Është një fakt: shumica e njerëzve e përdorin në sasi të pamjaftueshme kremin kundër diellit. SPF testohet duke aplikuar një shtresë të konsiderueshme kremi kundër diellit. Nëse nuk përdorni mjaftueshëm, nuk mund t’i besoni efektivitetit të tij. Për një të rritur, rekomandimi është 30 ml për të gjithë trupin dhe riaplikohet çdo 2 orë pas notit. Gjithashtu, mos harroni ta aplikoni të paktën 15 minuta para ekspozimit në diell për ta lënë të depërtojë.